【校長心聲】未來式教育培養孩子成領袖　救恩小學校長：讓學生發揮優點

我個仔希哥近排好熱衷玩bottle flip，簡單而言就係拋一個裝左少少水的膠樽，水樽於空中轉個圈，睇下可唔可以順利企番響度。單手、雙手、拋上幾級樓梯、蒙住眼，各種高難度動作，好似好勁又好似好無謂，我鼓勵佢的方法係「叻喇、叻喇，練耐啲可以去馬戲團表演。」希哥不以為意，又繼續練習，成間房大大小小膠樽十幾廿個。

我唔知佢呢個特殊技能，對於人生有乜幫助，但小朋友咁投入去練習，總不能打沉他的興趣吧，所以只可容忍膠樽不斷跌落地的噪音。心目中安慰自己，至少希哥會因為拋樽，上網做資料蒐集，搵下咩形狀的樽、個樽入幾多水，會容易啲抛到，又睇下外國的人玩到幾叻等等。更重要是他學到失敗而不放棄，堅持反複練習不斷進步才有機會成功。

成日都講今天的社會，需要的不是硬知識，因為無人叻得過Google大神，今時今日成功因素可能是各種各樣的軟技巧，如溝通能力、堅毅精精、創意等等。未來呢？就更加無人知。

我記得一位校長曾經咁反問過：「教育是未來式，我們現在談的教育是2035年，當你的小朋友讀完小學、中學、大學後，他能順利在這個時代發展嗎？」所以學校及家長應該去努力發掘小朋友獨一無二的亮點，令小朋友發揮優點。

呢位係救恩小學校長林克忠，他解釋：「以往的教育是以拔尖的形式，但往往會有不少漏網之魚，教育應該讓每一位小朋友發揮優點，加以培育，各自發揮。」救恩小學就是讓每一個同學都有不一樣的體驗，讓他們資優的一面可以浮面，這就是所謂的浮尖。他相信，每個人都是領袖，是不同方面的領袖。至於他是哪一方面的領袖，就要家長和老師好好去發掘了。

香港電台第一台《我們不是怪獸》「梁永樂-怪獸爸爸and friends」，周日晚10點新聞後播出。

撰文 : 梁永樂 八爪魚爸爸